Iccu iga yan urgaz amkraz, iɣzzifn da ittasi aqrabb nns azggwaɣ d uẓnnaṛ nns abrkan, iɛzza ɣurs ad isizdig timlsa nns ula udm ku ass, aynnaɣ a mi da ittmaḍal dat tissit, ar issirid udm nns ula tafgga[1] nns ku imalass, ar ittini yan wawal aqbur nna g inna :”timlsa d iḥruyn ad igan iṣfṭawn n iɛdawn[2]” afad ad nrms awal ad ; inna digs zɛma is ifukk i ufgan ad ilssa timlsa izddign afad ad yali s wuddur nns g walln n wiyyaḍ.
illa ɣurs yan uɣyul, ula ntta iḥla kigan, ihyya as tabarda nns tafrqact izddign iḥlan, iga uɣyul zund mummu n tiṭṭ n Iccu. abda ur da digs itthwu, da as yakka timẓin, ifk as alim, ifk as tuga, ar t ittawi s almu ku ḍaṛṭ tizwarnin. iddjiwn uɣyul, yuli d ḥjji nns, annayn t middn ẓṛan t ibdda iṣḥa. iwa ar t id ttettrn afad ad iss asin tuga nnsn d iẓaẓatn nnsn.
iccu yaɣul ar ittṛɛab acku yaɣul uɣyul nns da ikkat s tiqqar iddɣ ɛniv iddjiwn tuga, iddjiwn timẓin, idda ẓaṛs ad as d iṛẓm g ucbaṛu, ifk as d tiqqar.
ku tikklt g d isqsa kra baca ad yamẓ aɣyul, da as ittini Iccu :” ha nn aɣyul yaɣul icqa, hat da ikkat” ur t uminn mddn ɣaln is d tiḥllal nɣ d iskirkisn… yan wass, igan ass n ugadaz, inkr iccu iṛẓm i uɣyul nns s iɣnan waxxa da ikkat, yawi t s ugadaz zund ira ad t izznz, iqqn t s tgatut g udɣar g nzzan imudar.
ukan da d ittdu ka ad t iṣum nɣ d ad t iqllb, da t ikkat uɣyul iṣmmṛ t. imkinnaɣ ad iga lḥal sg tifawt ar tizwarnin, kra iqlb as, kra iṣmmṛ t, kra iẓbṛ t, kra ar ismummuy. iwa iddɣ annayn isbbabn aɣyul n Iccu is iqjr d is icqa, ddun ẓaṛṣ nnan as :” a Iccu, ha nn aɣyul nnk hat ur inni ad ak inz! hat kullu ma ad t inn inmalan, ifka as tiqqar!” inna asn Iccu :” hat ssnɣ is icqa d is imssus uɣyul inu, ssnɣ is iṣṭuy, ar ikkat s tiqqar? ɣir riɣ ad tisinm, ma ad mi iṣbṛ iccu g uɣyul nnaɣ…tfukka.
[1] : tafgga : taɣssa
[2] : iɛdawn:icngwa
Aghbalu
0 Iwnnitn -ⵉⵡⵏⵏⵉⵜⵏ:
Enregistrer un commentaire
Click to see the code!
To insert emoticon you must added at least one space before the code.